
Фатмир Битиќи
ПРАТЕНИЧКО ПРАШАЊЕ од пратеникот Фатмир Битиќи, поставено на 103-та седница на Собранието на Република Северна Македонија одржана на 28 мај 2026 година Пратеничкото прашање гласи: Второ прашање исто така, до министерката и се однесува на дефицитот кој ја открива вистинската состојба на јавните финансии. Јавниот долг е последицата, каматите се цената но, дефицитот е симптом што покажува дека Буџетот троши побрзо од колку што собира. А, кога тој симптом се повторува од месец во месец, тогаш може да зборуваме само за веќе воспоставен начин на управување со парите на граѓаните. И, ќе потсетам бидејќи се заборава, Законот за Буџети поставува цврсто фискално правило. Дефицитот на општата Влада не треба да надмине 3% од Бруто Домашен Производ. Тоа правило е заштитен механизам против политичката самоволност во трошењето на јавни пари. Но, Буџетот во 2026 година веќе е планиран на дефицитот од 3,5% од БДП, значи уште од стартот на годинава Владата не се придржуваше кон ова фискално правило. Проблемот е уште по сериозен затоа што, фискалната стратегија 2027 година - 2031 година не ја коригира таа патека. Туку ја претвора во среднорочна рамка и го нормализира дефицитот како трајна буџетска состојба. И, ова значи пресметките ви ги кажав во вторник, но ако ги видите последните податоци до 26 мај на фискалниот бројач, приходите изнесуваат 139 милијарди денари односно 36,95% од планот, додека расходите изнесуваат 167,2 милијарди денари и 40,35%, оваа разлика меѓу приходите и расходите веќе изнесува приближно 29 милијарди. Ако знаеме дека буџетскиот дефицит е 39,2 милијарди евра тогаш до 26 мај, 73% од планираниот дефицит е веќе потрошен. Инаку на 22 мај беше 76%, на 15 мај беше 81%, овие денови се подобрил приходот. Дополнително капиталните расходи не можат целосно да бидат алиби за овој дефицит. Затоа што, знаете каква е состојбата. Гувернерот на Народната банка Трајко Славевски, човекот од истата економска политичка провиниенција во интервју отвори можност дека дефицитот може да отиде до 6%, кога и од таа позиција се појавува предупредување за поголем дефицит тогаш Владата тешко може да ја продава приказната дека фискалната состојба е стабилна и под контрола. И, затоа прашувам. Дали Владата планира Ребаланс на Буџетот со зголемување на дефицитот. Дали ќе го пробиете веќе планираниот дефицит од 39,2 милијарди денари и дали сценарио за дефицит до 6% е веќе разгледувано во Министерството за финансии. Прашањето го поставувам до министерот за финансии.