
Сали Мурати
До: Претседателот на Собранието на Република Северна Македонија
ПРАТЕНИЧКО ПРАШАЊЕ до Министерството за односи меѓу заедниците
Почитуван Претседател на Собранието,
Согласно член 72 од Уставот на Република Северна Македонија, член 15 од Законот за Пратениците и членови 38 и 39 од Деловникот на Собранието, го поставувам следново пратеничко прашање до Министерството за односи меѓу заедниците на Република Северна Македонија.
КОНТЕКСТ И ОБРАЗЛОЖЕНИЕ
На 21 ноември 2025 година поставив пратеничко прашање до Министерството за односи меѓу заедниците за финансиските средства наменети за одбележување на национални и државни празници на заедниците. Во одговорот на министерството, доставен на 10 декември 2025 (Бр. 03-1836/1), изречно е наведено дека за одбележување на 21 декември - Денот на настава на турски јазик - се предвидени 2.008.000 денари, а дека постапката за набавка е објавена на 02.12.2025.
Сепак, на самиот ден на прославата - 21 декември 2025 година - турските невладини организации кои аплицираа за овие средства добиле известување дека постапката за јавна набавка 22083/2025 (со предмет: набавка одбележување на ден на настава на турски јазик - 21 декември) е ПОНИШТЕНА од страна на Комисијата за јавни набавки на Министерството.
И покрај ова, манифестацијата е одржана, но средствата не биле исплатени. Ова покренува сериозни прашања за транспарентноста, законитоста и отчетноста во трошењето на јавните средства.
КОНКРЕТНИ ПРАШАЊА:
1. Дали биле доделени 2.008.000 денари предвидени за одбележување на Денот на настава на турски јазик (21 декември 2025), согласно ветувањето дадено во министерскиот одговор? Доколку не биле доделени - кои се конкретните причини?
2. Зошто постапката за јавна набавка бр. 22083/2025 беше поништена токму на денот на прославата (21 декември 2025), а не пред или по настанот? Кој донел одлука за поништување и кои се образложените причини за поништување?
3. Кои се целокупните преписки (дописи, е-мелови, записници) помеѓу Министерството за политички систем и односи меѓу заедниците и турските невладини организации во врска со организацијата и финансирањето на прославата на 21 декември 2025 година? Барам доставување на сите споменати преписки. 4. Дали Министерството има сознанија дека манифестацијата (прослава на Денот на наставата на турски јазик) е сепак одржана, и покрај поништувањето на набавката? Доколку да - дали Министерството ја финансирало, ко-финансирало или на кој начин биле покриени трошоците за одржување на настанот? 5. Дали турските невладини организации кои аплицирале и организирале дел од активностите за оваа прослава биле компензирани за направените трошоци? Доколку не - дали Министерството ќе ги исплати истите и во кој рок? 6. Барам целосна хронологија и динамика на настаните: кога е донесена одлука за распишување на набавката, кога е објавена, кои субјекти аплицирале, кога и зошто е донесена одлука за поништување, кој ја донел, и кои понатамошни постапки се планираат за исплата на предвидените средства?
Барам конкретен, детален и документиран одговор на секое од горенаведените прашања, придружен со соодветна документација, во рок предвиден со Деловникот на Собранието на Република Северна Македонија.
Ваквото постапување на Министерството - давање ветувања преку официјален министерски одговор за издвоени средства, а потоа поништување на набавката на самиот ден на прославата - претставува сериозно нарушување на довербата на граѓаните и етничките заедници, и бара целосна отчетност пред Собранието.
Со почит,
Скопје, 23.02.2025
Сали Мурати Пратеник во Собранието на Република Северна Македонија