РЕПУБЛИКА СЕВЕРНА МАКЕДОНИЈА СОБРАНИЕ НА РЕПУБЛИКА СЕВЕРНА МАКЕДОНИЈА - СКОПЈЕ Бр.-Nr. 08-6090/3 29.10.2026 год.-viti
Влада на Република Северна Македонија КАНЦЕЛАРИЈА НА ПРЕТСЕДАТЕЛОТ НА ВЛАДАТА
Дата: 28-10-2026 Архивски број: 08-1788/2 До: Претседател на Собрание на РСМ г.Африм Гаши Предмет: Доставување одговор на пратеничко прашање Врска ваш бр.08-6090/2 од 08.10.2026 година
Почитуван,
Врз основа на член 43 став 2 од Деловникот на Собранието на Република Северна Македонија, во прилог Ви се доставува одговор од претседателот на Владата на Р.С.Македонија, на пратеничко прашање поставено меѓу две седници на Собранието на РСМ, на 07 октомври 2026 година, од пратеникот Димитар Апасиев.
Со почит,
Шеф на Канцеларијата на претседателот на Владата на Република Северна Македонија
Владимир Нелоски
Влада на Република Северна Македонија Бул. „Илинден“ бр. 2, 1000 Скопје | www.vlada.mk | info@vlada.mk
Влада на Република Северна Македонија П Р Е Т С Е Д А Т Е Л
Почитуван пратеник г-дин Апасиев,
Посетата на владината делегација на Соединетите Американски Држави и учеството на 81 Генерално собрание на Обединетите нации претставува официјална државна активност, реализирана во рамките на однапред утврдена дипломатска агенда и во функција на остварување на стратешките надворешнополитички и економски приоритети на Република Македонија.
Станува збор за посета чиј карактер, содржина и политичко значење беа јавно презентирани. Македонската јавност имаше можност непосредно и континуирано да биде информирана за активностите на владината делегација, за остварените средби, нивото на меѓународните соговорници и прашањата што беа предмет на разговорите. Целокупната дипломатска агенда беше предмет на јавно информирање, а институционалното претставување на државата се одвиваше во согласност со воспоставените дипломатски и протоколарни практики.
Во однос на организациските и финансиските аспекти, сите службени патувања и активности на владините претставници подлежат на законски утврдените правила, пропишаните процедури и механизмите за институционална и финансиска отчетност. Тоа е стандард што важи за секое службено претставување на државата, независно од местото, времетраењето или нивото на меѓународниот настан. Во составот на официјалната владина делегација немаше новинари, ниту беше организирано патување на новинари на товар на буџетските средства.
Она што особено сакам да го нагласам е дека меѓународното дејствување на Владата се заснова на јасно дефинирана надворешнополитичка ориентација, континуитет во дипломатските односи и стратешка определба за зацврстување на позицијата на Македонија во меѓународните политички и економски текови.
Присуството на највисоките меѓународни форуми, непосредниот дијалог со претставници на американските институции и остварувањето билатерални средби со меѓународни партнери се дел од редовното извршување на државните надлежности и обврски. Нашата надворешнополитичка определба е насочена кон продлабочување на стратешкото партнерство со Соединетите Американски Држави, унапредување на меѓународната соработка, зајакнување на економската дипломатија и доследно застапување на македонските национални интереси.
Влада на Република Северна Македонија П Р Е Т С Е Д А Т Е Л
За нас, суштинското прашање во оценувањето на една меѓународна посета е нејзиното политичко и дипломатско значење, придонесот кон билатералните односи и можностите што ги отвора за државата. Притоа, политичката оправданост на меѓународните активности и законската обврска за финансиска отчетност се две подеднакво важни димензии на одговорното владеење.
Владата ќе продолжи да ја спроведува својата меѓународна агенда со институционална сериозност, дипломатски континуитет и недвосмислена посветеност на државните интереси. Македонија има обврска да биде активен и кредибилен учесник во меѓународните процеси, со сопствена позиција, јасни приоритети и достоинствено претставување на највисоко државно ниво.
Со почит, проф.д-р Христијан Мицкоски