О Д Г О В О Р на пратеничко прашање од пратеникот Илире Даути, поставено на 50-та седница на Собранието на Република Северна Македонија, одржана на 29 мај 2025 година Благодарам претседателе. Почитувана пратеничке Даути, мала корекција, не е Нерово, е Норово. Селово се вика Норово, не е Нерово. И на македонски и на албански е Норово. Јас сум професор редовен на Универзитетот и ми е многу значајно кога децата сакаат да учат и да добијат правилно знаење, образование, и без разлика дали се тие Македонци, Албанци, Турци, Власи, конкретно, Срби, Бошњаци, Роми или од друга етничка заедница, се ќе сторам што е во моја моќ, согласно законите и Уставот, учениците да го добијат потребното знаење. И, исто како што се грижам за Норово и учениците од Норово, се грижам и за средношколците од Кирил Пејчиновиќ и за основците од Лешок и за сите ученици од Македонија, без разлика каде се наоѓаат. И тука не треба да имаме никаква дилема. Конкретно, да речеме, за средношколците од Кирил Пејчиновиќ од Тетово кои што долго време наставата ја следеа во контејнери, се најде општествено одговорна компанија која што одлучи да донира и се надевам дека многу скоро од денеска ќе почне реконструкцијата и ќе можат тие да имаат пристојни услови за следење на наставата. Инаку таа општествено одговорна компанија, донацијата што ја даде, одлучи да ја даде преку законски легална процедура, информирајќи го градоначалникот и Советот и за таа донација гласаа сите советници од сите политички партии. Меѓу кои и од Демократската унија за интеграција, од Алијанса за Албанците, од ВМРО ДПМНЕ, од СДСМ, од ВЛЕН, итн, сите едногласно гласаа. Има процедури, има правила, има закони, има Устав и мораме да ги почитуваме сите овие процедури, правила, закони и Устав, а вие тоа најдобро треба да го знаете, бидејќи сте исто така професор. Јас лично ќе појдам но Норово и ќе разговарам со родителите на овие дечиња, затоа што не сакам тоа да биде политичка злоупотреба. Затоа што на овие дечиња им треба образование. И јас лично ќе направам се, за тие дечиња да имаат пристојни услови да ја следат наставата, да добијат образование, а понатаму да се развиваат како свои индивидуи, лојални на својата татковина, законите и Уставот. Лично ќе појдам таму, еве ви давам збор и лично ќе се заложам овој проблем да се надмине без да има било какви партиски моменти. Но она што во моментот е таму фактичка ситуација е следна: Одговорна е општината, но и одговорни се тие кои што со донации одлучиле на законски нерегулирана и урбанистички нерегулирана парцела да градат објект. Без разлика што тие рекле овој објект ќе биде за вршење на образовна дејност. Има закони во државата и мораме пратеничке Даути да ги почитуваме тие закони. Еве јас ве повикувам заедно да појдеме во Норово, со нас да го земеме Законот за урбанистичко планирање, Законот за градежно земјиште, Законот за градење и Уставот, да најдеме парцела и да направиме за овие дечиња нешто. Еве, заедно ве повикувам ќе појдеме таму, немам никаков проблем. Ве молам, само од ова да не правиме политичка хајка или пак да вадиме политичка реторика, нема потреба. Инаку се сложувам со вас дека во многу објекти во целата територија на Македонија се потребни интервенции и на многу објекти за жал децата учат во супстандардни услови. Без разлика на етничката припадност, во сите делови, без разлика дали е тоа Норово или Ново Село. Без разлика дали е Слатина или Коњаре. Треба за сите како држава да обезбедиме. За жал, многу се крадеше и сега тие пари што се украдоа и завршија во приватни џебови, дали за купување на трговски центри, дали за нов возен парк, ролс ројс, мајбах мерцедес, фирми или нешто друго, наместо да завршат училишта во цело Норово. Наша обврска како Влада овие кои што на грбот на овие дечиња, кои што денеска за жал учат во такви услови, се богатеа и градеа палати и сараи, да ја обезбедиме правдата и да важат законите за сите нив подеднакво. Од прв до последен. И ќе важат, барем јас додека сум тука ќе важат. Тие што ги крадеа парите, наместо да градат, без разлика од која политичка партија доаѓаат, еве јас ви ветувам, имате мој збор, дека од прв до последен ќе одговараат. И ова не е закана, затоа што и мене ме боли кога ги гледам во какви услови овие дечиња добиваат знаење, исто како што ги гледам дечињата и од Лешок и од гимназијата Кирил Пејчиновиќ во какви услови учат. Јас се сеќавам при моите посети насекаде, тогаш бевме опозиција кога молев министерот за образование од Демократската унија за интеграција да се погрижи да ги подобри условите за овие ученици да добијат пристојно знаење, не баравме премногу, вклучително и оние во село Норово. Но, за жал, тој во тоа време одлучи повеќе да се занимава за потребите на еден универзитет приватен во Југозападна Македонија. Наместо да вложува за учениците во село Норово. И тоа боли. Сега слушам дека има силна битка кој да биде градоначалник во тој град во кој што се наоѓа тој универзитет, жестока битка во опозицијата, но имаше можност и наместо сега гола реторика, имаше доволно време како министер за образование да го стави во првите приоритети овој приоритет за село Норово кое што ќе го стави оваа Влада, јас ви ветувам, ви давам збор и да изгради согласно закон и Устав зграда во која што овие дечиња ќе учат. Децата не треба да се злоупотребуваат, децата се нашата иднина и тука е чиста мислата, тука нема вакви или такви. Без разлика на етничката припадност, сите деца се наши и така треба да се однесуваме. А јас ви ветувам, еве ви давам збор дека еден од главните приоритети на оваа Влада, тоа што не успеа министерот од редовите на ДУИ да го направи, ние ќе го направиме, еве јас ви ветувам, согласно законите и Уставот. Бидејќи побаравте одговор, еве ви давам одговор на вашето прашање. Благодарам.