
Игор Здравковски
ПРАТЕНИЧКО ПРАШАЊЕ од пратеникот Игор Здравковски, поставено на 57-та седница на Собранието на Република Северна Македонија одржана на 26 јуни 2025 година Пратеничкото прашање гласи: Овие денови одбележуваме една година од владеењето на оваа Влада која што е предводена од ВМРО ДПМНЕ и Коалицијата или една година од новиот почеток и обновата на Република Македонија. И до сега видовме дека можело поинаку, видовме дека не може да биде како до сега, со работењето на оваа Влада се внесе нова енергија, нов темелен пристап кон решавање на проблемите, итн, и ако оставиме на една оска математичка, да речеме, од минус многу, гледаме да дојдеме до некоја позитивна нула, за во наредниот период да почне онаа реална обнова на Македонија. До сега се постигна многу онаму каде што се можеше и се гледаше да се опфати во повеќе категории на граѓани, да тргнеме од пензионерите кои што добија покачувања, од изградбата на градинките за младите, за училиштата, реконструкции итн, она што многу ме радува е посебно освртот кон младите, кои што до сега заминуваат од Република Македонија, не поради тоа што немаат пари, не поради тоа што немаат егзистенција, туку поради неправдите, меѓутоа имавме една категорија на млади кои што имаат желба, енергија, меѓутоа немаат храброст и одлучност да почнат свој бизнис. И овој пат се донесе голем оперативен план на Владата кој што опфаќа повеќе од 16 илјади граѓани, во вредност од над 2,5 милијарди денари, односно над 40 милиони евра, за 7,5 милиони евра повеќе од претходниот оперативен план, каде што ќе се даде еден стимул на сите овие млади граѓани на Република Македонија да започнат сопствен бизнис каде што ќе ја покажат својата иновативност, со тоа и ќе останат во Република Македонија да дадат додадена вредност со својата креативност. Ме интересира, затоа што повикот беше до 20 јуни, дали почитуван премиер имате конкретни информации колку имаме апликанти до сега, во која насока се движи и кои би биле следните чекори, затоа што еве за Велес конкретно знам дека има многу поголема заинтересираност од она што до сега се предвидуваше дека ќе биде. Сакам да го поставам прашањето за да биде на ниво на Република Македонија. Прашањето го поставувам до претседателот на Владата на Република Северна Македонија.